ຂ່າວຕ່າງປະເທດ

ລົດເມນະຄອນຫຼວງ ຂອງຂວັນຈາກກຽວໂຕ

ນະຄອນຫຼວງວຽງຈັນໄດ້ລົດເມເປັນຂອງຂວັນ ຈາກນະຄອນກຽວໂຕປະເທດຍີ່ປຸ່ນຈຳນວນ 34 ຄັນ ເພື່ອນຳໃຊ້ເຂົ້າໃນການແກ້ໄຂບັນຫາການສັນຈອນໃນນະຄອນຫຼວງວຽງຈັນ ໃນຂະນະທີ່ຝ່າຍນະຄອນຫຼວງວຽງຈັນ ສປປ ລາວ ເຄີຍໄດ້ມອບຊ້າງຈຳນວນ 4 ໂຕໃຫ້ແກ່ສວນສັດ ນະຄອນກຽວໂຕ ເພື່ອເປັນຂອງຂວັນເມື່ອປີ 2014.

ນະຄອນຫຼວງກຽວໂຕໄດ້ຕັດສິນໃຈ ມອບລົດເມສະພາບດີຈຳນວນ 34 ຄັນ ທີ່ຖືກຢຸດໃຊ້ເນື່ອງຈາກກຽວໂຕໄດ້ຊື້ລົດໃໝ່ມາແທນ. ພິທີມອບໄດ້ຈັດຂຶ້ນທີ່ສຳນັກງານປົກຄອງນະຄອນກຽວໂຕ ໃນວັນທີ 29 ພະຈິກ 2016. ໃນຂະນະທີ່ລາວໄດ້ເຄີຍມອບຊ້າງສີ່ໂຕໃຫ້ກັບສວນສັດເມືອງກຽວໂຕເພື່ອເປັນຂອງຂວັນເມື່ອປີ 2014 ເຊິ່ງປີນັ້ນທາງການຍີ່ປຸ່ນກໍໄດ້ມອບຕົ້ນສະກຸລະແລະເຮັດສວນສະກຸລະຢູ່ເມືອງວຽງໄຊ ແຂວງຫົວພັນ. ເຈົ້າໜ້າທີ່ທີ່ກ່ຽວຂ້ອງໃນການມອບລົດດັ່ງກ່າວກ່າວວ່າ “ຕອນນີ້ເຮົາຫວັງວ່າລົດໂດຍສານໃນເມືອງຈະໄດ້ຮັບຄວາມຮັກຈາກຄົນໃນປະເທດລາວ”.

ລົດຈຳນວນດັ່ງກ່າວນັ້ນໄດ້ຖືກນຳໃຊ້ຢ່າງຖະໜຸຖະໜອມໃນນະຄອນກຽວໂຕເປັນເວລາ 18-20 ປີ ແລະໄດ້ຖືກນຳສົ່ງເຖິງວຽງຈັນ ວ່າງເດືອນມິຖຸນາ 2017. ປັດຈຸບັນລັດວິສາຫະກິດລົດເມນະຄອນຫຼວງວຽງຈັນໄດ້ມີການປັບປຸງ, ເຈາະປະຕູຜູ້ໂດຍສານໃໝ່ ແລະລົດລອງການແລ່ນລົດເບື້ອງຕົ້ນແລ້ວຕາມເສັ້ນທາງ ສູນການຄ້າໄອເຕັກ-ສູນການຄ້າຕະຫຼາດເຊົ້າມໍ, ສູນການຄ້າຕະຫຼາດເຊົ້າມໍ-ສູນການຄ້າໄອເຕັກ ເຊິ່ງທຸກໆ ຊົ່ວໂມງຈະມີລົດອອກ 1 ຄັນ ແລະມີຈຸດຈອດຮັບຜູ້ໂດຍສານຢູ່ 13 ຈຸດຕໍ່ຖ້ຽວ ໃຊ້ເວລາເດິນທາງ 30 ນາທີ (ຈາກໄອເຕັກ-ຕະຫຼາດເຊົ້າ ຫຼື ຈາກຕະຫຼາດເຊົ້າ-ໄອເຕັກ) ລາຄາປີ້ຂີ່ລົດ 4,000 ກີບ/ຖ້ຽວ. ຂ່າວໃຫ້ຮູ້ອີກວ່າ ຖ້າມີຄົນໃຊ້ບໍລິການຫຼາຍຂຶ້ນ ກໍຈະໄດ້ເພິ່ມຄວາມຖີ່ຂອງຖ້ຽວລົດຕື່ມ ແລະຈະຂະຫຍາຍເສັ້ນທາງໄປທົ່ວນະຄອນຫຼວງ ພາຍໃນບໍ່ດົນນີ້.

ຈາກການທົດລອງນຳໃຊ້ຕົວຈິງແລ້ວເຮົາເຫັນວ່າ ເປັນການບໍລິການລົດເມປະຈຳທາງທີ່ດີ ພະນັກງານຂັບລົດແລະເກັບເງິນນຸ່ງເຄື່ອງແບບ, ຜູ້ຂັບລົດມີການລາຍງານໂຕແລະແຈ້ງລາຍການເດິນທາງ, ພະນັກງານເກັບເງິນຈະແຈ້ງກ່ອນຈະຮອດແຕ່ລະປ້າຍ, ແລະລົດຈະຈອດຮັບຜູ້ໂດຍສານສະຈຸດປ້າຍຈອດທີ່ກຳນົດໄວ້ເທົ່ານັ້ນ. ລົດຈະອອກຈາກຈຸດເລິ່ມ ແລະຮອດປາຍທາງພາຍໃນເວລາທີ່ກຳນົດໄວ້ ເຊິ່ງເຊື່ອແນ່ວ່າຖ້າຫາກການບໍລິການດັ່ງກ່າວທົ່ວຕົວເມືອງແລ້ວ ຈະເຮັດໃຫ້ມີຜູ້ຊົມໃຊ້ຫຼາຍຂຶ້ນ ແລະບັນຫາການຈະລາຈອນທີ່ແອອັດໃນຕົວເມືອງກໍຈະຫຼຸດລົງຢ່າງແນ່ນອນ.

ແນວໃດກໍຕາມ, ໃນໄລຍະເບື້ອງຕົ້ນຍັງມີຜູ້ໂດຍສານຊົມໃຊ້ໜ້ອຍ ຫຼື ບາງຖ້ຽວບໍ່ມີຜູ້ໂດຍສານເລີຍກໍມີ ເຊິ່ງຈະຕ້ອງໄດ້ມີການປັບປຸງຈຸດລໍຖ້າລົດຫຼືຈຸດຈອດຮັບຄົນໂດຍສານຕື່ມເພື່ອໃຫ້ມີບ່ອນຮົ່ມສາມາດຢືນຫຼືນັ່ງຖ້າໄດ້, ປ້າຍຈຸດຖ້າລົດເມກໍຄວນຈະໃຫ້ມີຂະໜາດໃຫຍ່ຂຶ້ນມີຄວາມໂດດເດັ່ນເຫັນໄດ້ງ່າຍຂຶ້ນ, ການໂຄສະນາໃຫ້ປະຊາຊົນຮັບຮູ້ກໍເປັນເລື່ອງທີ່ຈຳເປັນ ແລະຄວນຈະໄດ້ຮັບການສົ່ງເສີມຈາກພາກລັດຕື່ມອີກ ເພື່ອໃຫ້ພະນັກງານລັດຖະກອນຫັນມາຊົມໃຊ້ລົດເມປະຈຳທາງນີ້ຫຼາຍຂຶ້ນ, ຖ້າເປັນໄປໄດ້ພາກລັດອາດຈະແບ່ງເງິນຄ່ານໍ້າມັນລົດມາເປັນການແຈກປີ້ລົດເມໃຫ້ແທນ ກໍຈະເພິ່ມຜູ້ໂດຍສານໄດ້, ປະຢັດງົບປະມານລັດລົງ ແລະສາມາດແກ້ໄຂບັນຫາຈະລາຈອນ ພ້ອມທັງນຳສັງຄົມເຂົ້າສູ່ການເດິນທາງທີ່ເປັນໂມງເປັນເວລາແລະມີລະບຽບຫຼາຍຂຶ້ນໄດ້.

ສານຈີນນຳນັກໂທດ 10 ຄົນມາມາຟັງການຕັດສິນໂທດປະຫານຊີວິດຕໍ່ໜ້າປະຊາຊົນ

ເມື່ອວັນທີ 18 ທັນວາ 2017 ເດິກາຣ໌ດຽນລາຍງານວ່າ ສານໃນເມືອງ ຫຼູ່ເຟິງ ມົນທົນກວາງຕຸ້ງຂອງຈີນ ນຳຕົວຜູ້ຖືກຫາ 10 ຄົນມາຟັງການຕັດສິນໂທດປະຫານຊີວິດຕໍ່ໜ້າປະຊາຊົນ ສ່ວນໃຫຍ່ກ່ຽວພັນກັບຄະດີຢາເສບຕິດ ຄາດຕະກຳ ແລະ ປົ້ນຊິງຊັບ ເມື່ອອ່ານຄຳພິພາກສາແລ້ວ ເຈົ້າໜ້າທີ່ຕຳຫຼວດໄດ້ນຳຕົວຈຳເລີຍທັງໝົດໄປທີ່ແດນປະຫານ ເຊິ່ງເວທີຕັດສິນຄະດີຕັ້ງຢູ່ສະໜາມກິລາແຫ່ງໜຶ່ງ ພ້ອມກັບການຮັກສາຄວາມປອດໄພຢ່າງເຂັ້ມງວດຂອງເຈົ້າໜ້າທີ່ຕຳຫຼວດ

ທັງນີ້ ການຕັດສິນໂທດປະຫານຊີວິດຕໍ່ໜ້າສາທາລະນະໃນຈີນເກີດຂຶ້ນໄດ້ຍາກຫຼາຍ ຫຼັງຈາກທີ່ຈີນໄດ້ປ່ຽນລະບອບການປົກຄອງ ຢ່າງໃດກໍ່ຕາມ ການທີ່ເມືອງ ຫຼູ່ເຟິງນຳກັບມາໃໍຊ້ອີກຄັ້ງ ຕັ້ງແຕ່ 5 ເດືອນກ່ອນ ໂດຍມີນັກໂທດ 8 ຄົນທີ່ຖືກຕັດສິນໂທດປະຫານຊີວິດຕໍ່ໜ້າປະຊາຊົນ ໃນຄະດີທີ່ກ່ຽວພັນກັບຂະບວນການຄ້າຢາເສບຕິດລາຍໃຫຍ່ ແລະ ຈັບຜູ້ຖືກຫາໄດ້ເຖິງ 182 ຄົນ ຮວມໄປເຖິງຍຶດຂອງກາງເປັນຢາໄອຊ໌ໄດ້ເຖິງ 3 ໂຕນ

ຈີນເປັນປະເທດທີ່ຕັດສິນປະຫານຊີວິດນັກໂທດທຸກປີ ໂດຍປີທີ່ຜ່ານມາມີຜູ້ຖືກຫາຄະດີຊາວຈີນຖືກຕັດສິນປະຫານຊີວິດໄປແລ້ວກວ່າ 2,000 ຄະດີ ຜູ້ຖືກຫາສ່ວນໃຫຍ່ທີ່ມີຄວາມຜິດກ່ຽວຂ້ອງກັບການຄ້າຢາເສບຕິດ ຫຼື ອະຊະຍາກຳທາງເສດຖະກິດມັກຈະລົງເອີຍດ້ວຍໂທດປະຫານ

ຄວາມຄືບຫນ້າ ການຮັບຮອງເອົາເມືອງເຢຣູຊາເລັມ ເປັນເມືອງຫລວງຂອງອິດສະລາແອນ

ສະຫະລັດອາເມລິກາ ໃຊ້ສິດ ວີໂຕ້ ໃນການອອກສຽງພິຈາລະນາ ຮ່າງມະຕິຂອງຄະນະລັດຖະມົນຕີຄວາມຫມັ້ນຄົງແຫ່ງ ສະຫະປະຊາຊາດ (UNSC) ທີ່ໄດ້ລະບຸໃຫ້ການຮັບຮອງເອົາເມືອງເຢຣູຊາເລັມ ເປັນເມືອງຫລວງຂອງອິດສະລາແອນ ຖືວ່າເປັນອັນໂມຄະ ສົ່ງຜົນເຮັດໃຫ້ຄະນະລັດຖະມົນຕີຄວາມຫມັ້ນຄົງແຫ່ງຊາດ ບໍ່ສາມາດອອກຂໍ້ມະຕິດັ່ງກ່າວໄດ້ ເຖີງແມ່ນວ່າ ອີກທັງ 14 ປະເທດສະມາຊິກ ຈະອອກສຽງສະຫນັບສະຫນຸນ.

                     ເອກອັກຄະລັດຖະທຸດ ປະເທດສະຫະລັດອາເມລິກາ ປະຈຳ ສະຫະປະຊາຊາດ

ທ່ານນາງ ນິກກີ້ ເຮເລຍ໌, ເອກອັກຄະລັດຖະທຸດ ປະເທດສະຫະລັດ ອາເມລິກາ ປະຈຳ ສະຫະປະຊາຊາດ ກ່າວວ່າ ການທີ່ຄະນະລັດຖະມົນຕີຄວາມຫມັ້ນຄົງແຫ່ງຊາດ ກຽມອອກຂໍ້ມະຕິດັ່ງກ່າວ ຖືວ່າເປັນການ ມິ່ນກຽດ ສະຫະລັດອາເມລິກາຈະບໍ່ລືມເຫດການໃນຄັ້ງນີ້ຢ່າງແນ່ນອນ. ຖືວ່ານີ້ເປັນອີກຫນື່ງຕົວຢ່າງທີ່ສະຫະປະຊາຊາດເຮັດໃຫ້ເກີດມີຜົນເສຍຫລາຍກວ່າຜົນດີ ໃນຄວາມຂັດແຍ້ງລະຫວ່າງ ປະເທດ ອິດສະລາແອນ ແລະ ປາເລສໄຕສ໌.

ຮ່າງມະຕິດັ່ງກ່າວ, ທີ່ ປະເທດເອຢິບ ເປັນຜູ້ສະເຫນີ ມີເນື້ອຫາສຳຄັນວ່າ ‘ການຕັດສິນໃຈ ຫລື ການກະທຳໃດໆ ທີ່ປ່ຽນແປງສະຖານະ, ລັກສະນະ ຫລື ອົງປະກອບຂອງປະຊາຊົນນະຄອນສັກສິດ ແຫ່ງ ເມືອງເຢຣູຊາເລັມ ຖືວ່າບໍ່ມີຜົນທາງກົດຫມາຍ ເປັນໂມຄະ ແລະ ຈະຕ້ອງຖືກຍົກເລີກ ເພື່ອເປັນການປະຕິບັດຕາມຂໍ້ມະຕິຕົກລົງຂອງຄະນະລັດຖະມົນຕີຄວາມຫມັ້ນຄົງແຫ່ງຊາດ’ ແລະ ຮຽກຮ້ອງໃຫ້ທຸກຊາດງົດເວັ້ນການໄປປະຈຳການທູດ ທີ່ ເມືອງເຢຣູຊາເລັມ ຕາມມະຕິເລກທີ 478 ຂອງຄະນະລັດຖະມົນຕີຄວາມຫມັ້ນຄົງແຫ່ງຊາດ ທີ່ອອກໃນປີ 1980.

ອີຢູ ບໍ່ສະຫນັບສະຫນູນ ແລະ ບໍ່ຮັບຮອງເມືອງເຢຣູຊາເລັມ ເປັນເມືອງຫລວງ ຂອງປະເທດ ອິດສະລາແອນ, ພ້ອມປະເທດອື່ນໆແມ່ນມີຄວາມເຫັນດີນຳກັນທີ່ຈະບໍ່ຮັບຮອງເມືອງເຢຣູຊາເລັມ ເປັນເມືອງຫລວງ ຂອງປະເທດ ອິດສະລາແອນ ເພາະນອກຈາກບໍ່ໄດ້ຊ່ວຍໃຫ້ສະຖານະການໃນຕາເວັນອອກກາງສະຫງົບລົງແລ້ວ ຍັງທຳລາຍໂອກາດທີ່ຄະບວນການສັນຕິພາບລະຫວ່າງ ອິດສະລາແອນ-ປາເລສໄຕສ໌.

ລັດຖະມົນຕີຕ່າງປະເທດຂອງ ປະເທດປາເລສໄຕ໌ ລະບຸວ່າຈະຂໍໃຫ້ມີການປະຊຸມສຸກເສີນຂອງສະມັດຊາໃຫຍ່ອົງການສະຫະປະຊາຊາດ ເພື່ອພິຈາລະນາປະເດັນເລື່ອງການຮັບຮອງເມືອງເຢຣູຊາເລັມຕໍ່ໄປ ເນື່ອງຈາກຄວາມຂັດແຍ້ງນີ້ຍັງມີການສູ້ຮົບໃນພື້ນທີ່ ນັບມື້ນັບຮຸນແຮງ ແລະ ຂະຫຍາຍວົງກວ້າງອອກໄປໃນຫລາຍປະເທດເຊັ່ນ: ເອຢິບ, ມາຣົກ, ລີບັງ, ຕວັກກີ ແລະ ອິນໂດເນເຊຍ ຕໍ່ເຫດການດັ່ງກ່າວເຮັດໃຫ້ ຮອງປະທານປະເທດສະຫະລັດ ໄມຄ໌ ເພນຊ໌ ເລື່ອນກຳນົດການຢ້ຽມຢາມພາກພື້ນຕາເວັນອອກກກາງອອກໄປ ໃນວັນທີ 19 ທັນວາ ໄປເປັນ ກາງເດືອນ ມັງກອນ ປີຫນ້າ.